Qarabağ müharibəsinin Şəhidi Oqtay Əliyevin doğum günü münasibətilə tədbir keçirilib
18 may 2023 | 09:27
Mayın 18-də A.Səfərov adına 114 saylı tam orta məktəbdə 1-ci Qarabağ müharibəsinin Şəhidi Oqtay Əliyevin doğum günü münasibətilə tədbir keçirilib.
Tədbirdə Rayon İcra Hakimiyyətinin başçısı Əziz Əzizov, YAP Suraxanı Rayon Təşkilatının sədri Vüqar Seyidov, RİHB-nin müavini Könül Axundova, şəhid ailələri, qazilər və digər qonaqlar iştirak ediblər.
İlk öncə tədbir iştirakçıları Şəhidin xatirəsinə həsr olunmuş fotolarından ibarət guşə ilə tanış olublar.
Daha sonra akt zalında davam edən tədbirdə Azərbaycan Respublikasının Dövlət Himni səsləndirilib və Ümummilli Lider Heydər Əliyevin və şəhidlərin xatirəsi bir dəqiqəlik sükutla yad edilib.
Məktəbin direktoru Ceyran Novruzova qonaqları salamlayıb və Şəhidin şərəfli ömür yolundan danışaraq, qəhrəmanların ölmədiklərini, daim qəlblərdə yaşadıqlarını bildirib.
Məktəbin şagirdlərinin təqdimatında Oqtay Əliyevin timsalında şəhidlərin əziz xatirəsinə həsr edilmiş bədii hissə nümayiş olunub.
Sonra Şəhidin həyat yoldaşı Nəsibə Əliyeva çıxış edərək xatirələrini bölüşüb və bu günkü gündə ölkə başçımız cənab İlham Əliyevin və Birinci vitse-prezident Mehriban xanım Əliyevanın Şəhid ailələrinə göstərdikləri diqqət və qayğıdan danışaraq təşəkkürünü bildirib.
Sonda RİH başçısı Əziz Əzizov çıxışında şəhidlərin döyüş yolunun gələcək nəsillər üçün nümunə olacağını, Vətən uğrunda canını fəda edən qəhrəmanların əbədiyyətədək xalqımızın yaddaşında yaşayacağını, onların xatirəsinin dövlətimiz tərəfindən daim uca tutulacağını bildirib. O, həmçinin belə tədbirlərin şagirdlərdə vətənpərvərlik ruhunun aşılanmasına xidmət edərək onların şəxsiyyət kimi formalaşmasında müstəsna rol oynadığını da diqqətə çatdırıb.
Keçidlər
