Dekabırın 29-da Suraxanı rayonunda Dünya Azərbaycanlılarının Həmrəyliyi Günü və Yeni il qeyd edildi
29 dekabr 2022 | 17:38
Dekabrın 29-da Suraxanı Rayon İcra Hakimiyyətinin təşkilatçılığı ilə rayon İcra Hakimiyyətinin başçısı Əziz Əzizovun, Suraxanı rayonundan Milli Məclisə seçilmiş deputatların, YAP Suraxanı rayon təşkilatının və rayonun hüquq-mühafizə orqanlarının rəhbərlərinin, Şəhid ailələri və qazilərin, rayonun idarə, müəssisə, təşkilat rəhbərlərinin, ziyalıların iştirakı ilə Dünya Azərbaycanlılarının Həmrəyliyi Günü və Yeni il münasibətilə tədbir keçirilib.
Şəhidlərimizin əziz xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlanan tədbirdə ilk olaraq müqəddəs and yerimiz və baş tacımız olan şəhidlərimizin rəssam Elmar Məmmədzadə tərəfindən ipək üzərində işlənilmiş kölgə effektli portretləri zala daxil olub. Qonaqlar tərəfindən ayaq üstə, alqışlarla qarşılanan portretlər düzüldükdən sonra hərbi vətənpərvərlik mahnılarının məşhur ifaçısı Şəmistan Əlizamanlı hər kəsin qəlbinə yol tapan mahnıları ilə çıxış edib.
Sonra Rayon İcra Hakimiyyətinin başçısı Əziz Əzizov çıxış edərək Dünya Azərbaycanlıların Həmrəyliyi Günü və Yeni il münasibətilə tədbir iştirakçılarını təbrik edib, bu əlamətdar günün əhəmiyyətindən, o cümlədən Müzəffər Ali Baş Komandan cənab İlham Əliyevin rəhbərliyi altında 44 günlük Vətən müharibəsində qazandığımız tarixi ədalətin zəfər çalmasında xalqımızın göstərdiyi birlik və həmrəyliyin bütün dünyaya sübut olunduğundan söz açıb. Həmçinin, Şəhidlərimizə Allahdan rəhmət diləyən RİH başçısı Əziz Əzizov tədbirdə iştirak edən şəhid ailələrinə və qazilərə bir daha hörmət və ehtiramını bildirib.
Bayram tədbirində Milli Məclisin deputatları Afət xanım Həsənova, Sevinc xanım Fətəliyeva, Etibar Əliyev, YAP Suraxanı Rayon Təşkilatının sədri Vüqar Seyidov, Şəhid valideynləri, jurnalist Təranə Qasımova, Respublikanın əməkdar artisti, ADMİU-nin dosenti, Rayon Ağsaqqallar Şurasının sədr müavini Ağalar Bayramov çıxış edərək xoş arzularını və təbriklərini çatdırıblar.
Tədbirdə Azərbaycan Respublikası Prezidentinin Sərəncamı ilə “Dövlət qulluğunda fərqlənməyə görə” təltif edilmiş Suraxanı RİHB-nin Bülbülə qəsəbə inzibati ərazi dairəsi üzrə nümayəndəsi Elçin Seyfullayevin medalı və rayonun ictimai-siyasi həyatında fəal iştirakına görə Rayon İcra hakimiyyəti başçısının müvafiq Sərəncamı ilə təltif edilmiş bir qrup şəxsin Fəxri Fərmanı təqdim edilib.
Tədbir Azərbaycan Respublikasının xalq artisti, eləcə də bir neçə ay bundan öncə Özbəkistan Respublikasının Xalq artisti adına layiq görülən sevimli ifaçı Gülyanaq Məmmədova və onun tələbələrinin təqdimatında konsert proqramı ilə davam edib.
Keçidlər
