Bu gün Vətən müharibəsinin qəhrəman şəhidlərindən biri olan İslamlı Ruhid Uğur oğlunun doğum günüdür
01 aprel 2023 | 10:13
Şəhidin doğum günü Suraxanı gənclər evində qeyd olunub, onun əziz xatirəsi ehtiramla anılıb.
1 aprel 1999-cu ildə Lerik rayonunun Çeşman kəndində anadan olan İslamlı Ruhid Uğur oğlu ailəsi ilə birgə 2000-ci ildə Bakı şəhərinə köçüb. 2005-ci ildə Əhmədli Humanitar Fənlər Təmayüllü Məktəb Liseyinin 1-ci sinfinə gedən Ruhid 2011-ci ildən Suraxanı rayonu Dədə Qorqud qəsəbəsində yerləşən 315 №-li tam orta məktəbdə təhsilini davam etdirib.
Təhsil aldığı müddətdə hələ kiçik yaşlarından Ruhid cüdo, teakvondo, güləş, qaydasız döyüş, üzgüçülük və digər idman növləri ilə məşğul olub, yarışlarda iştirak edib. Regional və respublika səviyyəli rəsmi dövlət yarışlarına qatılıb, nailiyyətlər qazanıb.
Həmçinin, məktəb dövründə də intellektual yarışlara, viktorinalara, olimpiadalara qatılan intellektual və vətənpərvər gənc Ruhid bir sıra yarışlar, flaşmoblar və s. təşkil edib. O, Naxçıvan Dövlət Universitetini psixoloq ixtisası üzrə bitirmişdi.
2020-ci ildə hərbi xidmətə çağırılan Ruhid Vətən müharibəsi dövründə Talış kəndi və Suqovuşan istiqamətlərində döyüşüb. Oktyabrın 6-ı müharibənin qızğın dövründə Goranboyun Gülüstan kəndi yaxınlıqda strateji əhəmiyyətli yüksəkliyə malik Çənlibel postunda qəhrəmancasına Şəhid olub. Suraxanı rayonu, Dədə Qorqud Şəhidlər Xiyabanında dəfn olunub.
Ölümündən sonra şəhid İslamlı Ruhid Uğur oğlu Prezident cənab İlham Əliyevin müvafiq Sərəncamları ilə "Vətən uğrunda", "Suqovuşanın azad olunmasına görə", "Cəsur döyüşcü" medalları və 3-cü dərəcəli Vətənə xidmətə görə ordeni ilə təltif edilib.
İslamlı Ruhid Uğur oğlunun timsalında bütün şəhidlərimizə Allahdan rəhmət, onların ailə üzvlərinə isə səbr diləyirik.
Keçidlər
