Bu gün Vətən müharibəsinin qəhrəman şəhidlərində biri olan Suraxanı rayon sakini İsmayılov Sərdar Sərvər oğlunun doğum günüdür
31 iyul 2023 | 15:57
Sərdar İsmayılov 1995-ci il iyulun 31-də #Bakı şəhərində anadan olub.
Sərdar İsmayılov orta təhsilini Yeni Suraxanıda yerləşən 101 nömrəli tam orta məktəbdə alıb. Gənc yaşlarında hərbi xidmətə böyük maraq göstərən qəhrəman Cəmşid Naxçıvanski adına Hərbi Liseyə daxil olmaq qərarına gəlsədə bu cəhdi baş tutmayıb. Daha sonra o təhsilini kompyuter elmləri ixtisası üzrə kollecdə davam etdirib. Hərbi xidmətə əsgər kimi başlayan Sərdar xidməti bitirdikdən sonra ailəsinə yenidən hərbi xidmətə yollanıb vətənə xidmət etmək istədiyini bildirib. Ailəsi onun haqqında xatirələrində hərbi xidmət zamanı qolunun sındığını, qolundakı gipsin oktyabr ayının 5-i açılacağını gözləmədən özü sökərək döyüşə qatıldığını bildirir.
Sərdar 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə qəhrəmanlıqla savaşıb.
Sərdar İsmayılov oktyabrın 3-də Füzuli döyüşləri zamanı Qaraxanbəyli kəndi istiqamətində ağır yaralanaraq hospitala aparılıb və oktyabr ayının 4-ü gecə ağır yaralarından dolayı qəhrəmancasına şəhid olub.
Qeyd edək ki, Sərdar İsmayılov ölümündən sonra Prezident cənab İlham Əliyevin müvafiq Sərəncamlarına əsasən "Vətən uğrunda", "Füzulinin azad olunmasına görə" medalları ilə təltif olunub.
Sərdar İsmayılovun timsalında bütün şəhidlərimizin əziz xatirəsini dərin ehtiraml anırıq.
Keçidlər
