Bu gün Vətən müharibəsində qəhrəmancasına döyüşərək şəhidlik zirvəsinə ucalan Kazımlı Mürsəl Kamil oğlunun doğum günüdür
23 iyul 2023 | 11:43
Bu gün Vətən müharibəsində qəhrəmancasına döyüşərək şəhidlik zirvəsinə ucalan Kazımlı Mürsəl Kamil oğlunun doğum günüdür.
Mürsəl Kazımlı 23 iyul 1992-ci ildə Bakı şəhərində anadan olub. Orta təhsilini Pərviz İsmayılov adına 278 saylı orta məktəbdə alan M.Kazımlı 2002-2007-ci illərdə 36 saylı musiqi məktəbinin tar sinfində təhsil alıb. Orta məktəbi əla qiymətlərlə bitirdikdən sonra, o, 2010-cu ildə 613 balla UNEC-in Mühasibat uçotu və audit fakültəsinə daxil olub. 2014-ci ildə universiteti bitirən Mürsəl Hərbi xidmətini Gəncə, Naftalan və Tərtər artilleriya korpusunda rabitəçi kimi keçib. Əmək fəaliyyətinə isə 2016-cı ildə 2 saylı Tibb kollecində mühasib kimi başlayıb.
2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Mürsəl Kazımlı Füzuli döyüşlərində savaşıb. Oktyabrın 23-də Füzuli rayonunun Kürdlər kəndində qəhrəmancasına şəhid olub. Suraxanı rayonu, Dədə Qorqud qəsəbəsi Şəhidlər xiyabanında dəfn edilib.
Qeyd edək ki, Mürsəl Kazımlı ölümündən sonra prezident cənab İlham Əliyevin müvafiq sərəncamlarına əsasən 3-cü Dərəcəli Vətənə Xidmətə görə Ordeni ilə, "Vətən uğrunda" və "Füzulinin azad olunmasına görə" medalları ilə təltif olunub.
Allahdan bütün şəhidlərimizə rəhmət, onların ailələrinə isə səbr diləyirik.
İnanırıq ki, bu gün Şəhidlərimizin ruhu şaddır. Çünki məhz belə vətənpərvər gənclərimizin canı-qanı bahasına bu gün Qarabağımız azaddır.
Keçidlər
