Bu gün Vətən müharibəsində qəhrəmancasına döyüşərək şəhidlik zirvəsinə ucalan Əsgərov Rüfət Mürvət oğlunun doğum günüdür
29.08.1981-ci il tarixdə anadan olan Rüfət Əsgərov 1988-1996-cı illərdə Xətai rayonunda yerləşən Ə.Əliyev adına 204 nömrəli tam orta məktəbdə, 1996-1999-cu illərdə isə Cəmşid Naxçıvansкi adına Hərbi Liseydə təhsil alıb. Ali hərbi təhsilini 1999-2003-cü illərdə Heydər Əliyev adına Azərbaycan Ali Hərbi Məktəbində alıb.
Leytenant R.Əsgərov 2003-2009-cu illərdə Azərbaycan Silahlı Qüvvələrinin Beyləqan rayonunda yerləşən "N" saylı hərbi hissəsində, 2009-2012-ci illərdə baş leytenant rütbəsi ilə Ağcabədi rayonunda yerləşən "N" saylı hərbi hissədə xidmət edib.
Sonra kapitan rütbəsinə layiq görülüb və 2012-2014-cü illərdə Gəncə şəhərində yerləşən "N" saylı hərbi hissədə, 2014-cü ildə isə Tovuz rayonunda yerləşən "N" saylı hərbi hissədə xidmət edib.
2014-cü ildə mayor rütbəsi alan R.Əsgərov həmin ildən Heydər Əliyev adına Azərbaycan Ali Hərbi Məкtəbinin (AAHM) Kəşfiyyat kafedrasının baş müəllimi işləyib.
Hərb yolu həm də Xüsusi Təyinatlı Qüvvələrdən keçmiş mayor R.Əsgərov 2020-ci il sentyabrın 27-də başlanan Vətən müharibəsi zamanı Suqovuşanın azadlığı uğrunda gedən döyüşlərdə, həmçinin Ağdərə şəhəri istiqamətində gedən döyüşlərdə savaşıb. Ermənistan Silahlı Qüvvələrinin 24-dən çox hərbçisini məhv edib, həmçinin üç postun Azərbaycan Ordusunun nəzarəti altına alınmasında fərqlənib.
Füzuli ərazisində, "Su-25" tipli təyyarədə döyüş tapşırığını yerinə yetirərəkən şəhid olan Rüfət Əsgərov II Fəxri xiyabanda dəfn olunub.
Rüfət Əsgərov ölümündən sonra Prezident cəmab İlham Əliyevin müvafiq sərəncamına əsasən "Vətən uğrunda" medalı ilə təltif edilib.
Eyni zamanda, şəhid mayor ordudakı misilsiz xidmətlərinə görə həmçinin III dərəcəli "Qüsursuz xidmətə görə", II dərəcəli "Qüsursuz xidmətə görə", I dərəcəli "Qüsursuz xidmətə görə" medalları, "Azərbaycan Silahlı Qüvvələrinin 90 illiyi" yubiley medalı, "Azərbaycan Silahlı Qüvvələrinin 95 illiyi" yubiley medalı, "Azərbaycan Ordusunun 100 illiyi" yubiley medalı ilə təltif edilib.
Rüfət Əsgərovun timsalında bütün şəhidlərimizin əziz xatirəsini dərin ehtiramla anırıq.
