Suraxanıda Ulu Öndər Heydər Əliyevin anadan olmasının 92 illiyi münasibəti ilə konsert olmuşdur

Hər il may ayının gəlişini xalqımız sevinc, ümid və iftixar hissilə qarşılayır.  Bu da təsadüfi deyil. Məhz bu ayda müasir Azərbaycan dövlətinin memarı və qurucusu, xalqımızın xilaskarı, Ümummilli  Liderimiz Heydər Əliyevin doğum günü  təntənə ilə, böyük məhəbbət və ehtiramla bayram edilir.
Suraxanı rayonunda Azərbaycan xalqının Ümummilli Lideri, Ulu Öndər Heydər Əliyevin anadan olmasının 92-ci ildönümü münasibəti ilə silsilə tədbirlər keçirilir. Növbəti belə tədbir Suraxanı rayonu Heydər Əliyev parkında keçirilmişdir.
Suraxanı Rayon İcra Hakimiyyətinin və İctimai Televiziyanın birgə təşkilatçılığı  ilə canlı yayımla konsert proqramı təşkil olmuşdur. Konsertdə Suraxanı rayon İcra Hakimiyyətinin başçısı İlqar Abbasov, Milli Məclisin deputatı Ağacan Abıyev, RİHB yanında Şuranın üzvləri, rayonun hüquq-mühafizə orqanlarının rəhbərləri, rayon ziyalıları və ictimaiyyətin nümayəndələri iştirak etmişdir.
Xüsusi tərtibatla hazırlanmış səhnədə Ulu Öndərin portretinin ətrafı təbii güllərlə bəzədilmişdi. Təbiii güllərdən hazırlanmış I Avropa Oyunlarının loqosu, “Məşəl” kompozisiyası, I Avropa oyunlarının şərəfinə iştirakçı dövlətlərin sayı qədər düzülmüş xüsusi dayaqlar üstündə yaradılmış gül kompozisiyası səhnəyə  xüsusi yaraşıq verirdi.
Aparıcı qeyd etdi ki,  bu gün biz fəxrlə, böyük qürur hissi ilə deyirik ki, memarı Heydər Əliyevin olduğu milli dövlətçilik bizim ən böyük milli sərvətimizdir. Xalqımızın əbədi Lideri, Ulu Öndər Heydər Əliyev isə təkcə XX əsrin deyil, ümumiyyətlə, Azərbaycan tarixinin yetirdiyi ən böyük, dahi şəxsiyyətdir.
Müstəqil Azərbaycana rəhbərliyi dövründə Ulu Öndərin  həyata keçirdiyi islahatlar, böhran içərisində çapalayan Azərbaycan iqtisadiyyatının dirçəldilməsi, gücləndirilməsi istiqamətində həyata keçirdiyi genişmiqyaslı quruculuq işləri ölkəmizi dünya birliyinə qovuşduran yolu işıqlandırdı. Məhz liderlərə məxsus bu cəsarət, qətiyyət, dönməzlik və məğrurluq müasir Azərbaycanın imicini artırdı, nüfuzunu yüksəltdi.
Bu gün Azərbaycan Heydər Əliyev yolu ilə irəliləyir və inkişaf edir. Ümummilli Lider Heydər Əliyevin uzun illər apardığı düşünülmüş siyasət və bu siyasi kursun möhtərəm Prezidentimiz cənab İlham Əliyev tərəfindən uğurla davam etdirilməsi bu gün respublikamızı, sözün həqiqi mənasında, beynəlxalq aləmdə söz sahibinə çevirir və mövqelərini daha da möhkəmləndirir.
Aparıcı xüsusi vurğuladı ki, fəaliyyətə başladığı ilk gündən etibarən Heydər Əliyev Fondu onun Prezidenti, YUNESKO və İSESKONUN Xoşməramlı səfiri, Milli Məclisin deputatı Mehriban xanım Əliyevanın rəhbərliyi ilə Azərbaycanda və dünyada humanitar, həmçinin sosial problemlərin həlli, təhsil, mədəniyyət sahələri üzrə irimiqyaslı  layihələri reallaşdırır.
Ölkəmiz ən müxtəlif beynəlxalq tədbirlərə ev sahibliyi edir. İyun ayının 12-də I Avropa Oyunlarına start veriləcəkdir. I Avropa Oyunlarına hazırlıq üzrə Təşkilat Komitəsinin işi, xüsusən onun sədri Mehriban xanım Əliyevanın fəaliyyəti ən yüksək təriflərə layiqdir. Təşkilat Komitəsi başqalarının yeddi ilə görə biləcəyi işi 3 dəfə qısa müddətə - 2,5 ilə, özü də keyfiyyətlə başa çatdırmağa nail olmuşdur.
I Avropa Oyunlarının Bakıda keçirilməsi ölkəmiz üçün, ümumiyyətlə, bütün Avropa Olimpiya hərəkatı üçün tarixi hadisədir.
26 aprel 2015-ci il tarixdə “Atəşgah Məbədi”ndə “Bakı-2015” ilk Avropa Oyunlarının məşəli alovlandı. Məşəli möhtərəm Prezidentimiz cənab İlham Əliyev alovlandırdı.
Bu, adi məşəl deyildi. Bu, ilk Avropa Oyunlarının ilk məşəlidir. Bu xoşbəxtlik, ilkə imza atmaq səadəti müstəqil Azərbaycana, onun müdrik və müasir düşüncəli dövlət başçısına nəsib oldu.
Konsertdə ölkəmizin tanınmış mədəniyyət və incəsənət ustaları maraqlı və rəngarəng konsert proqramı ilə çıxış etdilər. Konsert  möhtəşəm atəşfəşanlıqla başa çatdı.