Suraxanıda birinci Avropa Oyunlarına hazırlıq işləri davam edir

Paytaxtın Suraxanı rayonunda “Bakı-2015” birinci Avropa Oyunlarına hazırlıq işləri çərçivəsində abadlıq-quruculuq işləri həyata keçirilir, iməciliklər təşkil edilir.
İlk Avropa Oyunlarının məşəlini alovlandırmaq üçün od Suraxanı rayonunda yerləşən “Atəşgah məbədi” Dövlət Tarix Memarlıq Qoruğundan götürüləcək. Hazırlıq işləri ilə əlaqədar rayonun Səttar Bəhlulzadə, İlqar Məmmədov, Şahin Məhərrəmov və Xanlar Ələkbərov küçələrində yaşayış və qeyri-yaşayış obyektlərinin fasadlarının yenidən qurulması işləri yekunlaşdırılır. Əmircan qəsəbəsinin Vladimir Balandin, Neftçi və Malik Mustafayev küçələrində yenidənqurma işləri davam etdirilir. Rayonda silsilə tədbirlər, o cümlədən abadlıq-quruculuq işləri aparılır, müxtəlif yerlərdə ağaclar əkilir.
Budəfəki iməcilik Heydər Əliyev prospektindən “Atəşgah məbədi” Dövlət Tarix-Memarlıq Qoruğuna gedən Səttar Bəhlulzadə, İlqar Məmmədov, Xanlar Ələkbərov küçələrində baş tutub. Eyni zamanda, Tofiq Bayram parkında yenidənqurma işləri tamamlanmaq üzrədir. Burada qəsəbə sakinlərinin istirahəti hər cür şərait yaradılacaq. Rayon Mənzil-Kommunal Təsərrüfatı Birliyi, qəsəbələrin icra və bələdiyyə nümayəndələri və sakinlərin iştirakı ilə müvafiq təmizləmə işləri aparılır, ətraf ərazilər məişət tullantılarından təmizlənir, texnika ilə yol kənarlarında hamarlanma işləri görülür.
Ötən il rayon ərazisində 8 min, o cümlədən birinci “Ümumrespublika yaşıllaşdırma marafonu” çərçivəsində 4 min 700 ting əkilib.