18 aprel 2022-ci il tarixdə "Sərhəd" hərbi-idman oyunu üzrə Suraxanı rayonu, Hövsan zona birinciliyi keçirilib

Gənc  nəsli Vətənə, onun sərhədlərinə hörmət ruhunda tərbiyə etmək, yaradıcı düşünən, sağlam gənclər yetişdirmək və onlarda  sərhədçi peşəsinə marağı  artırmaq   məqsədi ilə  18 aprel 2022-ci il tarixdə Suraxanı Rayon İcra Hakimiyyətinin, Dövlət Sərhəd Xidmətinin Sahil Mühafizəsinin və Suraxanı rayon Gənclər və İdman  İdarəsinin  birgə  təşkilatçılığı ilə Suraxanı rayonu, Hövsan qəsəbəsi üzrə ümumtəhsil məktəblərinin 10 sinif şagirdlərindən ibarət 6 komanda ilə "Sərhəd" hərbi-idman oyunu üzrə Suraxanı rayonu, Hövsan zona birinciliyi keçirilmişdir.
Tədbirdə Suraxanı rayon İcra Hakimiyyəti başçısının müavini Könül xanım Axundova, Dövlət Sərhəd Xidmətinin Sahil Mühafizəsinin şəxsi heyyət üzrə şöbəsinin rəisi, birinci dərəcəli kapitan Mehman Hacıyev, Suraxanı RİHBA-nın və Suraxanı rayon Gənclər və İdman  İdarəsinin əməkdaşları  iştirak etmişlər.   
Yarışın baş hakimlər kollegiyasının qərarına əsasən zona birinciliyi uğrunda mübarizədə qəsəbənin M.Mehdiyev adına 280 nömrəli tam orta məktəbinin komandası 1-ci yeri tutaraq  Bakı şəhər zona birinciliyinə vəsiqə qazanmışdır. Yarışda E.Qaranzadə adına 270 nömrəli tam orta məktəbin komandası 2-ci, V.Mirzəliyev adına 281 nömrəli tam orta məktəbin komandası isə 3-cü yerə layiq görülmüşlər.