Növbəti dəfə martın 3-də Suraxanı rayonu, 327 saylı tam orta məktəbdə “narkomaniyaya YOX deyək” mövzusunda maarifləndirici tədbir keçirilib

Tədbirdə Suraxanı Rayon İcra Hakimiyyətinin başçısı Əziz Əzizov, Rayon Prokuroru Rəşid Mahmudov, Rayon Polis İdarəsinin rəisi Süleyman Neymətov, Dövlət Təhlükəsizlik Xidmətinin Suraxanı rayon İdarəsinin rəisi Rauf Məmmədov,  RİHBA-nın və hüquq-mühafizə orqanlarının əməkdaşları, məktəbin şagird və müəllim kollektivi iştirak etmişlər.
Tədbir iştirakçıları məktəblilərin hazırladıqları əl işlərindən ibarət sərgi ilə tanış olduqdan sonra məktəbin direktoru Səadət Məmmədova mövzu ətrafında çıxış edərək narkomaniyanın sağlam həyat tərzi üçün yaratdığı  təhlükə ilə bağlı məlumat vermişdir.
Daha sonra şagirdlərin ifasında narkotik vasitələrindən istifadə və onun yaratdığı fəsadlardan bəhs edən tamaşa göstərilmiş, maarifləndirici video-çarxlar nümayiş olunmuşdur.
Tədbirdə çıxış edən Rayon İcra Hakimiyyətinin başçısı Əziz Əzizov müasir dövrümüzdə insanlıq üçün böyük bəlaya çevrilən narkomaniya ilə mübarizənin vacibliyindən, yeniyetmə və gənclər arasında narkomaniyanın qarşısının alınması istiqamətində daim ictimai nəzarətin zəruriliyindən bəhs etmiş, həmçinin narkomaniyanın gətirdiyi bəlalar, onun istifadəçilərinin qarşılaşdığı faciələr barədə ətraflı məlumat vermişdir.
Rayon Prokuroru Rəşid Mahmudov, Rayon Polis İdarəsinin rəisi Süleyman Neymətov və Dövlət Təhlükəsizlik Xidmətinin Suraxanı rayon İdarəsinin rəisi Rauf Məmmədov çıxış edərək gənclərə narkomaniyanın fəsadları haqqında ətraflı məlumat vermiş, sağlam həyat tərzinin üstünlüklərini onlara hərtərəfli çatdırmış, eləcə də ölkəmizdə narkomaniya ilə mübarizə sahəsində görülən işlərdən bəhs etmişlər.