Şəhid gizir Vəliyev Sehran Nizami oğlu doğum günündə 315 №-li tam orta məktəbdə anılıb
Vətən müharibəsinin Şəhidi gizir Vəliyev Sehran Nizami oğlunun doğum günü ilə əlaqədar övladlarının təhsil aldıqları Suraxanı rayonu, 315 №-li tam orta məktəbdə anım tədbiri keçirilmişdir.
Tədbirdə Şəhidin həyat yolundan bəhs edilmiş, onun xatirəsinə həsr olunmuş videoçarx nümayiş etdirilmiş, şagirdlərin ifasında vətənpərvərlik ruhunda şeirlər səsləndirilmişdir.
Qeyd edək ki, Sehran Vəliyev 23 fevral 1993-cü ildə Biləsuvar rayonunun Nəsimi kəndində anadan olub. 2016-cı ildə gizir rütbəsinə layiq görülüb, daha sonra kəşfiyyat manqasının komandiri vəzifəsini daşıyıb. Şəhidin bizlərə 3 övladı yadigar qalıb.
Füzuli uğrunda gedən qızğın döyüşlərdə şəhidlik zirvəsinə ucalan Sehran Vəliyev ölümündən sonra Azərbaycan Respublikası Prezidentinin müvafiq Sərəncamları ilə “ Vətən uğrunda”, “Füzulinin azad olunmasına görə”, “Qubadlının azad olunmasına görə” medallarına layiq görülüb.
