Fevralın 18-də Şəhid Eissavi Muhamməd Mazen oğlunun doğum günündə bulaq-abidə kompleksinin açılış mərasimi keçirilib

Fevralın 18-də Müzəffər Ali Baş Komandan cənab İlham Əliyevin rəhbərliyi ilə Azərbaycanın suverenliyi və ərazi bütövlüyü uğrunda Şanlı Ordumuzun qalib gəldiyi 44 günlük Vətən Müharibəsində şəhid olan qəhrəman oğullarımızdan Eissavi Muhamməd Mazen oğlunun doğum günündə Suraxanı Rayon İcra Hakimiyyəti tərəfindən inşa edilmiş bulaq-abidə kompleksinin açılış mərasimi keçirilmiş, Şəhidin məzarı ziyarət olunmuşdur.
Mərasimdə Rayon İcra Hakimiyyətinin başçısı Əziz Əzizov, Dövlət Təhlükəsizlik Xidmətinin Suraxanı rayon İdarəsinin rəisi Rauf Məmmədov, YAP Suraxanı rayon təşkilatının sədri Vüqar Seyidov, RİHB-nin müavinləri və şöbə müdirləri, Hövsan qəsəbə inzibati ərazi dairəsi üzrə nümayəndəsi, bələdiyyə sədri, Şəhid Ailələrinin Müdafiə Cəmiyyətinin sədri, Şəhidin doğmaları və yaxınları iştirak etmişlər.
Şəhidin bulaq-abidə kompleksinin və məzarının önünə gül dəstələri düzülərək ruhuna dualar oxunmuş, əziz xatirəsi ehtiramla yad edilmişdir.
Daha sonra, Eissavi Muhamməd Mazen oğlunun məzun olduğu Ə.Məmmədov adına 76 saylı tam orta məktəbdə doğum günü münasibətilə anım tədbiri keçirilmişdir. Məktəbin şagirdlərinin ifasında təqdim olunan bədii hissənin yekununda Rayon İcra Hakimiyyətinin başçısı Əziz Əzizov çıxış edərək Ali Baş Komandan cənab İlham Əliyevin rəhbərliyi ilə müzəffər ordumuzun gücü və peşəkarlığı sayəsində qazanılan zəfərimizdə, alınan torpaqlarımızın hər qarışında neçə-neçə şəhidimizin qanının, hər birinin fərqli qəhrəmanlıq səlnaməsinin olduğunu qeyd etmiş və Eissavi Muhamməd Mazen oğlunun timsalında  bütün Şəhidlərimizə Allahdan rəhmət, onun ailəsinə isə səbr diləmişdir.
Həmçinin, Şəhidin anası İlhamə xanım, qardaşı, müəllimləri və sinif yoldaşları çıxış edərək onunla olan xatirələrini bölüşmüşlər.