Suraxanıda “Uşaq hüquqları aylığı” çərçivəsində tədbir keçirilmişdir

    Rayon İcra Hakimiyyətinin təşkilatçılığı ilə 19 oktyabr 2014-cü il tarixdə Suraxanı rayonu Qaraçuxur qəsəbəsinin Yeni Günəşli yaşayış sahəsində yerləşən Xüsusi Qayğıya Ehtiyacı olan Uşaqlar üçün Reabilitasiya Mərkəzində “Uşaq hüquqları aylığı” çərçivəsində tədbir keçirilmişdir.
    Tədbiri giriş sözü ilə açan Suraxanı rayon İcra Hakimiyyəti başçısının müavini Sevinc Hüseynova qeyd etdi ki, ənənəvi olaraq hər il 20 oktyabr-20 noyabr tarixlərində BMT-nin Uşaq Hüquqları Konvensiyasının qəbul edilməsinin ildönümü ərəfəsində respublikamızda  “Uşaq hüquqları aylığı” elan edilir. Aylığın keçirilməsində məqsəd uşaqlara diqqətin artırılması, uşaq hüquqlarının həyata keçirilməsi vəziyyətinin daha da yaxşılaşdırılmasıdır.          
    Azərbaycan Respublikasının Prezidenti cənab İlham Əliyevin 27 dekabr 2011-ci il tarixli Sərəncamı ilə təsdiq edilmiş “Azərbaycan Respublikasında İnsan Hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı”nda uşaq hüquqlarının müdafiəsi ilə bağlı müddəalar təsbit olunmuş və uğurla həyata keçirilir.
    Bu sahə ölkə rəhbərliyinin diqqətində olan və qayğı göstərilən sahələrdən biridir.
    Bunun bariz nümunəsi rayonun Qaraçuxur qəsəbəsinin Yeni Günəşli yaşayış sahəsində Heydər Əliyev Fondunun Prezidenti YUNESKO və İSESKO-nun Xoşməramlı Səfiri, Millət vəkili  Mehriban xanım Əliyevanın təşəbbüsü ilə Heydər Əliyev Fondunun inşa etdiyi ən müasir avadanlıqlarla təciz olunmuş Xüsusi Qayğıya Ehtiyacı olan Uşaqlar üçün Reabilitasiya Mərkəzidir. Burada cəmiyyətə adaptasiyası məqsədi ilə müalicəyə cəlb olunmuş uşaqların problemləri diqqətdə saxlanılır.
    Tədbirdə çıxış edənlər Azərbaycan Respublikası İnsan Hüquqları üzrə Müvəkkili, Ombudsman aparatının məsul işçisi Müqalib Mahmudov, “Oriqami” Uşaq və Yeniyetmələr İctimai Birliyinin sədri Namiq Nəcəfov dövlətimiz tərəfindən bu sahəyə olan diqqət və qayğıdan, bu problemlə məşğul olan qeyri-hökumət təşkilatlarına, tibbi müəssisələrinə,  reabilitasiya mərkəzlərinə və digər qurumlara yaradılan şəraitdən və bütün müsbət təşəbbüslərin dəstəkləndiyindən danışdılar.
    Tədbirdə Suraxanı rayon 37 saylı Musiqi məktəbinin kollektivi xüsusi olaraq uşaqlar üçün hazırlanmış rəngarəng proqramla çıxış etdilər.
    Tədbir iştirakçıları Mərkəzdə uşaqların davranışın korreksiyası məqsədi ilə mövcud olan metodikalardan effektivliyini artırmaq üçün  fizio-əmək terapiyası, loqopediya və digər müalicə üsullarının tətbiq edildiyi xüsusi otaqları gəzdilər və uşaqların spesifik xüsusiyyətlərinə görə aparılan müalicə üsulları ilə tanış oldular.
     Tədbirin sonunda uşaqlara hədiyyələr təqdim edildi.